အာဏာရှင်ဟောင်း နေဝင်း၏မြေးများက လိုင်စင်မဲ့ဇိမ်ခံကားများကို ၉ ဂဏန်းပါ ယာဉ်နံပါတ်များဖြင့် စီးနင်းအသုံးပြုနေပြီး စစ်တပ်နှင့်ရဲများက အရေးမယူရဲသည့်အပြင် အလေးပါပြုနေ
ရန်ကုန်၊ ဩဂုတ် ၅
အာဏာရှင်ဟောင်း နေဝင်း၏ မြေးများဖြစ်သော ကျော်နေဝင်း၊ ဇွဲနေဝင်းနှင့် အေးနေဝင်းတို့က လိုင်စင်သက်တမ်းကုန်ဆုံးနေသော ဥရောပထုတ် ဇိမ်ခံကားများကို နံပါတ် ၉ ဂဏန်းပါ ယာဉ်နံပါတ်များ တပ်ဆင်ကာ ရန်ကုန်မြို့တွင် စီးနင်းအသုံးပြုနေသော်လည်း သက်ဆိုင်ရာ ယာဉ်ထိန်းရဲ၊ စစ်တပ်ထောက် လှမ်းရေးနှင့် အထွေထွေအုပ်ချုပ်ရေးအဖွဲ့များက အရေးယူဖမ်းဆီးခြင်းမပြုဘဲ အလေးပါပြုနေကြကြောင်း စစ်တပ်သတင်းရင်းမြစ်များထံမှ သိရသည်။
ရန်ကုန်ခေတ်သစ်က စုံစမ်းသိရှိရသည့် အချက်အလက်များအရ ကျော်နေဝင်း၊ ဇွဲနေဝင်းနှင့် အေးနေဝင်းတို့သည် Mercedes-Benz၊ Range Rover Sport အပါအဝင် ဥရောပထုတ် ဇိမ်ခံကားများကို အသုံးပြုနေပြီး ယင်းကားများတွင် ယာဉ်လိုင်စင်သက်တမ်း တိုးမြှင့်ထားခြင်းမရှိသလို ယခင်ယာဉ်ဟောင်းများ၏ နံပါတ်ပြားများကို လိုင်စင်မဲ့ကားသစ်များတွင် ပြောင်းလဲတပ်ဆင် အသုံးပြုနေကြောင်း သိရသည်။
လက်ရှိ အသုံးပြုနေသော ယာဉ်နံပါတ်များတွင် 7H-9922၊ 9I-9922၊ 9I-9911 စသည့် ၉ ဂဏန်းပါဝင်သော နံပါတ်များ ပါဝင်ပြီး ၉ ဂဏန်းမှာ အာဏာရှင်ဟောင်း နေဝင်းနှင့် မိသားစုအသုံးပြုခဲ့သည့် ယတြာနံပါတ်ဂဏန်းလည်းဖြစ်သည်။
ယင်းလိုင်စင်မဲ့ယာဉ်များကို အများပြည်သူသုံးလမ်းများပေါ်တွင် နေ့စဉ်အသုံးပြုနေသော်လည်း ရန်ကုန်မြို့ရှိ ယာဉ်ထိန်းရဲတပ်ဖွဲ့ဝင်များ၊ စစ်တပ်ထောက်လှမ်းရေးနှင့် သက်ဆိုင်ရာ အုပ်ချုပ်ရေးတာဝန်ရှိသူများက ဖမ်းဆီးအရေးယူခြင်း မပြုရဲကြဘဲ လမ်းကြောင်းရှင်းပေးခြင်းနှင့် အလေးပြုဆက်ဆံခြင်းများသာ လုပ်ဆောင်နေကြောင်း သိရသည်။
ယင်းဖြစ်စဉ်သည် ယခင်က ထွက်ပေါ်ခဲ့သည့် ကျော်နေဝင်းနှင့် ဇွဲနေဝင်းတို့၏ Range Rover Sport ဇိမ်ခံကားများ ဝယ်ယူထားခဲ့သည့် ချေးငွေအမှုနှင့်လည်း ဆက်စပ်နေကြောင်း သိရသည်။
ရရှိထားသည့် အချက်အလက်များအရ ကျော်နေဝင်းနှင့် ဇွဲနေဝင်းတို့သည် Land Rover–Capital Group ထံမှ Range Rover Sport ဇိမ်ခံကား ၇ စီးကို AYA ဘဏ်၏ ကားဝယ်ယူရေးချေးငွေစနစ်ဖြင့် ဝယ်ယူခဲ့ပြီး ကား ၇ စီးအတွက် အရင်းနှင့်အတိုးပေါင်း ကျပ် ၅ ဘီလီယံကျော်ကို ယနေ့အချိန်အထိ ပြန်လည်ပေးဆပ်ခြင်းမရှိကြောင်း သိရသည်။
ယင်းချေးငွေနှင့်ပတ်သက်၍ AYA ဘဏ်က ကျော်နေဝင်း၊ ဇွဲနေဝင်းနှင့် Omni Focus ကုမ္ပဏီကို တရားစွဲဆိုခဲ့ရာ ရန်ကုန်တိုင်း အရှေ့ပိုင်းခရိုင်တရားရုံးတွင် Omni Focus ဘက်မှ အမှုရှုံးနိမ့်ခဲ့ပြီး အထက်တရားရုံးများသို့ အယူခံဝင်ခဲ့သော်လည်း အယူခံများအားလုံး ပယ်ချခံခဲ့ရကြောင်း သိရသည်။
ထို့ပြင် ၂၀၂၆ ခုနှစ် ဇွန်လ ၂၆ ရက်နေ့တွင် ပြည်ထောင်စုတရားလွှတ်တော်ချုပ်၌ Omni Focus က တင်သွင်းထားသည့် ပြင်ဆင်မှုအမှတ် ၃၀၁၊ ၃၁၂၊ ၃၁၃၊ ၃၁၄ နှင့် ၃၁၅ အမှုများကိုလည်း ပယ်ချခဲ့သဖြင့် AYA ဘဏ်ဘက်မှ အနိုင်ရရှိခဲ့ပြီး ကျန်ရှိနေသည့် ချေးငွေကို ပြန်လည်ပေးဆပ်ရန် တရားရုံး၏ အပြီးသတ်ဆုံးဖြတ်ချက် ထွက်ရှိထားကြောင်း သိရသည်။
သို့သော် တရားရုံးအဆင့်ဆင့်တွင် အမှုရှုံးနိမ့်ပြီး ငွေပြန်လည်ပေးဆပ်ရန် အမိန့်ချမှတ်ခံထားရသော် လည်း ကျော်နေဝင်းနှင့် ဇွဲနေဝင်းတို့သည် ကျပ် ၅ ဘီလီယံကျော်ကို ပြန်လည်ပေးဆပ်ခြင်းမရှိဘဲ Range Rover Sport ဇိမ်ခံကားများကို လိုင်စင်သက်တမ်းမတိုးဘဲ ဆက်လက်အသုံးပြုနေကြောင်း စုံစမ်းသိရှိရသည်။
ယင်းဇိမ်ခံကားများမှာ ယာဉ်လိုင်စင်သက်တမ်းကုန်ဆုံးနေသည်မှာ ၇ နှစ်ကျော်ရှိပြီဖြစ်ပြီး ဥပဒေအရ ဖမ်းဆီးအရေးယူရမည့် အခြေအနေရှိသော်လည်း ကျော်နေဝင်းသည် စစ်ခေါင်းဆောင် မင်းအောင်လှိုင်အပါအဝင် စစ်ဗိုလ်ချုပ်များနှင့် နီးစပ်သည့် ဆက်ဆံရေးကို အကာအကွယ်အဖြစ် အသုံးပြုထားသဖြင့် သက်ဆိုင်ရာဌာနများက အရေးယူဆောင်ရွက်ခြင်းမရှိကြောင်း သိရသည်။
ထို့အပြင် ကျော်နေဝင်းပိုင် Omni Focus ကုမ္ပဏီအုပ်စုသည် AYA ဘဏ်ထံမှ ကျပ်ဘီလီယံ ၅၀ ချေးယူ၍ YBS ယာဉ်အစီးရေ ၅၀၀ ဝယ်ယူခဲ့သော်လည်း ယင်းချေးငွေများကိုလည်း ယနေ့အချိန်အထိ ပြန်လည်ပေးဆပ်ခြင်းမရှိကြောင်း၊ တရားရုံးတွင် အမှုရှုံးနိမ့်ပြီးနောက်တွင်လည်း ကြွေးမြီများကို ဆက်လက်မပေးဆပ်သေးကြောင်း စုံစမ်းသိရှိရသည်။